Радуются воины, Серафиме, верныя, с нимиже и лекари, отче, и певцы Божественныя с живописцы, зовуще ти: ты наша похвала, святе, и укрепление.
Святый священномучениче Серафиме, моли Бога о нас:
Архиерей подобаше таков, иже малодушныя утешит, заступит немощныя, безчинныя же вразумит, и о всех долготерпелив явлься, душу положит о Христе, образ предпоказуя нам человеколюбнаго снизхождения.
Святый священномучениче Серафиме, моли Бога о нас:
Филаретова слова наследника, Серафимова же тезоименна певца,
Игнатиево стяжавша трезвение и Феофанову мудрость, свято-Бутовскаго предстоятеля, Иоанна великаго благословение убо воспоем вси.
Святый священномучениче Серафиме, моли Бога о нас:
Иже подвиг воспев преподобнаго, таже онаго похвалу, Серафиме, стяжав, любовию немощным обычною снисходяй, прости словес убожество, не довлеют бо и вмале сии превелией твоей святости.
Слава: Многочастне и многообразне Бог, дивный во святых Своих, тя прославляет, Серафиме, и мы Тому серафимскую песнь вопием: Свят еси и пресвят, новомученик молитвами помилуй нас.
И ныне: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати, слава Тебе.
Светилен, подобен «Посетил ны есть»:
Просветил тя есть / миру Светом нарекийся, / да истинно светоявиши, Серафиме огненне, / любовь Того пресветлую / - и кистию благословенною, / и ясным житием, // и светозарным мученичеством.
Слава, и ныне: Света превечна приятелище, / Дево Мати Господня, // просвети рабы Твоя.
На хвалитех стихиры, глас 8, подобен «О преславнаго чудесе»:
Отче Серафиме благообразне, / Еще прежде ти обета иноческа / Явися присным образ яко ангельский твой: / Се привлекл еси своих си шествовати по Христе, / Се бо дщери ти и внука следуют о Господе твоим стопам, / Се и именем трие нарицаются единым серафимским, / Да явишися, чудне отче, похвалою и надеждею тем, / Да умолиши Христа о сродных ти по плоти и духу, / Да во веки возгласят любочестну песнь о тебе: // Сей от рода нашего есть.
В славней, Серафиме отче, памяти твоей, / Единятся две столицы русския: / Чтит Петра верховнаго сугубо тя град, / Рождество хваля и архипастырство, / Чтит первопрестольная излишше / Ради первых подвигов священнических, / Наипаче же о страдании в Бутове, / Единятся убо зде и тамо / Новодевичии ти присныя обители, / Внукою игуменией взывая о тебе: // Сей от рода нашего есть.
Собираеши пречудне Серафиме, / В торжество твое сиятельное / Живописцы, воины, врачи, / С нимиже истории любители, / Со певцами таже песнописцами, / Чтущих верно тя молитвенника сим, / Яко истинно вознесша до небес / Тех о Господе служение высокое, / Возсылающих ти ныне хвальное согласие: // Сей от рода нашего есть.
Человече Божий Серафиме, / Се в любезней сердцу памяти твоей / Радуются слова рачителие, / И монахов свеселится множество, / С нимиже сословие играет священное, / Вси же нуждею терпящии утешаются, / О внимании ти, златословесну витии, / Ведая молитвы тиха тя делателя, / Пастыря изряднаго о мудрости, / Необорима же терпением мученика, / Всем бо образ был еси и правило, / Упование не посрами убо хвалящих тя: // Сей от христозваннаго рода нашего есть.
Стих: Исповемся Тебе во век, яко сотворил еси, и терплю имя Твое, / яко благо пред преподобными Твоими.
Серафиме похвало всерусская, / Зрим тя преподобных сонаследника - / Серафимов прежняго и новаго: / Оваго бо сподобился еси явления преяснаго, / Яко детища тому любезна святописателю, / Инаго же сотаинника приснаго, / Исповедания веры соревнителя, / Иже в Вырице благословением твоим / От безбожных премудре сокрытаго, / Подвигом же прежнему уподобившася, / И в последняя времена святоявленна. / Возгласим убо ликованием, о вернии, / О чудней преподобносерафимстей троице: / Сии, Триипостасне Боже Человеколюбче, // От рода нашего суть.
Слава, глас и подобен тойже:
Отче святолюбезне Серафиме, / Славы о ревнителю великаго Саровскаго отца, / Трепетною рукою описавый / Богородицы тому Пречистыя явление: / Возгласи бо Славнейшая серафим апостолом / О блаженном Божием угоднике / Слово, еже и о тебе исполньшееся, / От святых небес ти ныне возглашаемое, / И от русския земли доле вторимое: // Сей от рода нашего есть.
И ныне, глас и подобен тойже:
О преславнаго чудесе: / Небеси и земли Царица / От святых сродников наших умоляема, / До ныне землю Русскую покрывает / И Лика Своего изображеньми милостивно обогащает: / О, Владычице Державная, / Не престани и на будущее время / Во утверждении на Руси православия - // Милости и чудеса изливати до века. Аминь.
НА ЛИТУРГИИ
Блаже́нны на 8, глас 4:
Блаже́ни ми́лостивии, / я́ко ти́и поми́ловани бу́дут.
Божия ти объятия отверзаются, мира отрекшуся доброму пастырю, имя и житие восприемлющу серафимския.
Блаже́ни чи́стии се́рдцем, / я́ко ти́и Бо́га у́зрят.