Апостольску ученику подобяся, о словесном даре, дивно в тебе умножившуся, не небрегл еси, Серафиме мудре, - и нашу худость снисхождением восприими в верное ти ученичество.
Святый священномучениче Серафиме, моли Бога о нас:
Благодать Божия непрестанно борется за людей, к покаянию возбуждая, - сице взывал еси, Серафиме отче, - в сем подвизе и пребывал еси житием, иже во Христе.
Слава: О даров пребогатых, имиже осени тя благодать Божественная, отче! О труда твоего неусыпнаго! О духовных плодов новаго Дамаскина русскаго!
И ныне: Разрешити Адамову клятву, слезы утолити Евины грядеши, Чистая, в Вифлеем, немотство же греха уставити славословящих Человеколюбца.
Песнь 6
Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею кровию.
Святый священномучениче Серафиме, моли Бога о нас:
Юже предзрел еси скорбь, древний приим Кананита жребий, та и срете ядом тя клеветы, паки же ненавидением злых, горьким изгнанием печатлея зачало новаго ти, Серафиме, подвига.
Святый священномучениче Серафиме, моли Бога о нас:
Щедростию души пречуткия, отче, заступал еси невинныя, враждующия умиряя, горькою разделенных смутою к покаянию воздвизал еси жертвенным образом, еже во Орле и Бессарабии служения твоего.
Святый священномучениче Серафиме, моли Бога о нас:
И в первые лета пути архипастырска зрел еси, Серафиме, велию скорбь грядущую, яко дел не отвергаем тьмы, по завету апостола, и во оружие света не облекаемся.
Святый священномучениче Серафиме, моли Бога о нас:
Яко зрел, совершенен плод благодати Божественныя и вседенных ти, отче, трудов явился еси в благославней Твери, единением в дусе возжигая веру пастырей, с нимиже и паствы.
Слава: Устрояеши приходскую жизнь, о неленостне трудниче, взывая в оныя лихия и на вся грядущия времена: несть Руси воскресения без духовных пастырей.
И ныне: Камо идеши, Чистая? Чесо ради течение совершаеши? Сына родити Превечна гряду в Вифлеем, да клятвы избавит Адама с праматерию.
Кондак, глас 2:
Твердаго и боговещаннаго исповедника веры, жизни церковныя мудраго устроителя, преподобным Серафимом возхваленнаго, архиерея преиспытанна и пламенна мученика, славу Руси Серафима новаго, вернии, любовию похвалим вси.
Икос:
Златоустовою возпламенившись ревностию, паки Григориево тайнозрение явль, о духом велие Серафиме, Василиеву твердость управлением церковным наследуя, Серафима преподобнаго воздыхание о Руси притяжал еси, паки и пастырю Кронштадтскому горением непрестанным духа уподобился еси, предивне отче. Над всем же сим мученический ти сияет венец. Слово изнемогает, но любовию дух зовет:славнаго Серафима да похвалим вси.
Песнь 7
Ирмос: В пещи авраамстии отроцы персидстей любовию благочестия паче, нежели пламенем опаляеми взываху: благословен еси в храме славы Твоея, Господи.
Святый священномучениче Серафиме, моли Бога о нас:
Руси, смутою пораженною, се гонения прелютыя на Церковь воздвизаются, се и старец-архиерей от пределов своих изгнан - из Твери первее, из Варшавы пресмутныя, даже до града Архангелова многоболезненный досязает Серафим.
Святый священномучениче Серафиме, моли Бога о нас: