Слава: Тело немощствует крайностию, адамантова воздыхает смирением душа, бодрствует зверонравным неприкосновен дух Серафима-старца, мучеников богоизбранна вождя, велия ныне Руси заступника.
И ныне: Внутри Тебе Самой, богомудрствует священномученик Серафим, осталася слава Твоя, Богомати, на земли, всем же неприкосновенною соделася - и Сыну Твоему Божественному, сего ради язык наш, поющ Тебе, умолкает.
Прокимен, глас 4:
Тебе ради, Господи, / умерщвляеми есмы весь день.
Стих: Вменихомся якоже овцы заколения.
Евангелие от Иоанна, зачало 36
Стихира по Евангелии, глас 6:
Святым иже суть на Руси святей, / новомучеником преславным, / удиви Господь хотение Свое, / еже Церковь Русскую возродити / дерзновенным сих ходатайством, / сего ради Серафиму, велию стратигу сих, / подвигом пламенным прославлену, / паки и о всей Руси умоляющу, возопиим: // радуйся солнце новое земли Русския!
Канон, глас 4
Краегранесие: Не остави бедствующия, на борющия укрепи, отче наш Серафиме
Песнь 1
Ирмос: Моря чермную пучину невлажными стопами древний пешешествовав Израиль, крестобразныма Моисеовыма рукама Амаликову силу в пустыни победил есть.
Святый священномучениче Серафиме, моли Бога о нас:
Не остави суетою отягченнаго мя, слово воспети тя ниспосли, ко вниманию вышнему, отче Серафиме, настави.
Святый священномучениче Серафиме, моли Бога о нас:
Еже в славнем семействе воинстем рождество твое, еже со преподобными и святыми пастыри твое житие, с мучениками же память твоя, Серафиме.
Святый священномучениче Серафиме, моли Бога о нас:
Отечеству и Царю служение, яко добра рода крест на рамо приемлеши, да озарится земля Болгарская и твоим подвигом - русскаго доблестию воина.
Святый священномучениче Серафиме, моли Бога о нас:
Супругу дивноблагородную избираеши Наталию, яко истинный рачитель семьи являешися, сия малыя церкве, по Златоустому.
Слава: Талант врачебный вверяет трудолюбию твоему, святче, Господь, да, верою утверждаяся, еже человеку на благо изыщеши в творении, премудре, Божием.
И ныне: Аннина яже от неплодства Дщерь чревоносит ныне Безсеменно Рождество, - взыграйте, людие, песнопоюще.
Катавасия: Христос раждается:
Песнь 3
Ирмос: Лук сильных изнеможе, и немощствующии препоясашася силою, сего ради утвердися в Господе сердце мое.
Святый священномучениче Серафиме, моли Бога о нас:
Вся мирская, аще и пред человеки достойна суть, яко суету вменяеши, пастырю послушлив Кронштадтскому, присным тому являеши ся - по духу любве пастырския.
Святый священномучениче Серафиме, моли Бога о нас:
Иже нас ради распныйся, се и тя к сораспятию зовет, крест вдовства на рамена ти возлагает, яко вся ведый - и терпение и любовь твою.
Святый священномучениче Серафиме, моли Бога о нас:
Божия ти объятия отверзаются, мира отрекшуся доброму пастырю, имя и житие восприемлющу серафимския.
Святый священномучениче Серафиме, моли Бога о нас:
Еже по образу Христову взывая: "Мне подобает делати дела Пославшаго мя", - се прославляеши Тем прославленныя, летописуя о вверенных ти, Серафиме, обителех, о Зосимовей пустыни и лавре Евфимиевей, се обновлением духа тыя возсозидаеши.