2. ЭКГ-ны стенокардияның ұстамасы кезінде тіркеу.
3. ЭКГ ұзақ мониторлы бақылау.
4. Күш түсіру (салмақ салу) сынамасы:
- физикалық күш түсіру
- жүрекшелерді электростимуляциялау
5. Фармакологиялық сынамалар:
- дипиридамол (курантил) қолданылатын сынама
- изопротеренол (изадрин) қолданылатын сынама
- добутамин қолданылатын сынама
- эргоновин қолданылатын сынама
6. ЖИА диагностикасының радионуклидты әдістері:
7. Эхокардиография.
8. Коронароангиография.
9. Позитронды – эмиссиондық томография.
10. Магнитті – резонансты томография.
Функциональдық сынамалар кезінде пайда болған ишемия белгілерін ЭКГ, эхокардиография және радионуклидті әдістер көмегімен анықтайды.
Электрокардиография. Ишемияға ең тән белгі – ST сегментінің изоэлектрлік сызықтан төмен немесе жоғары кем дегенде 1 мм-ге ығысуы. Миокардтың субэндокардиальдық ишемиясында көбіне ST сегменті изоэлектрлік сызықтан төмен 1 мм және одан да көп ығысады. Субэпикардиальдық ишемияда ST сегменті жоғары ығысады. Интрамуральдық ишемияда ST сегменті изоэлектрлік болып қалады немесе жоғары не төмен болмашы ғана ығысады, ал Т тісшесі инверсияға ұшырайды. Спонтандық стенокардияда ST сегменті тез көтеріліп, биіктеген Т тісшесімен күмбез тәрізді қосылады.
Миокард ишемиясындағы ST сегментінің ЭКГ-ң қарсы тіркемелерінде ығысуы дискор-дантты болып келеді.
ST сегментінің изоэлектрлік сызықтан төмен ығысуы әр түрлі болады. Миокард ишемия-сына тән ST сегментінің ығысуына оның горизонтальды және қия төмен ығысуы жатады. ST сегментінің қия жоғары ығысуы да патологиялық ығысу деп есептеледі, егер ол басталған жерінен (j нүктесі - S тісшесінің ST аралығына ауысқан жері) кейін 0,08 с. бойы изосызықтан 1 мм-ге және одан көп ығысқан күйде қалса.
Миокард ишемиясының ЭКГ – белгісіне Т тісшесінің әр түрлі өзгерістері де жатады. Бірақ Т тісшесінің өзгерістерінің маңызы ST аралығының ығысуына қарағанда төменірек болады. Субэндокардиальдық ишемияда биік коронарлық Т болады, субэпикардиальдық, трансмуральдық немесе интрамуральдық ишемияда теріс мәнді Т тісшесі болады. Миокард ишемиясында Т тісшесі екі фазалы болуы мүмкін және жадағайланып өзгеруі мүмкін.
ЭКГ-ға қарап шамамен ишемияның орнын анықтайды. Қай тіркеменің ишемияның қандай орнын көрсететіні:
- I, V3, V4 – сол жақ қарыншаның алдыңғы қабырғасының ишемиясын көрсетеді;
- V1, V2, V3 – пердеалды аймақтың ишемиясын көрсетеді;
- I, avL, V5, V6 – сол жақ қарыншаның бүйірінің ишемиясын көрсетеді;
- аvL – бүйірдің жоғарғы бөлігінің ишемиясын көрсетеді;
- V4 – жүрек ұшының ишемиясын көрсетеді;
- III, avF – сол жақ қарыншаның артқы қабырғасының ишемиясын көрсетеді.
Көрсетілген өзгерістер ЭКГ-ны ангинозды ұстама кезінде және ұстамадан 15-20 мин кейін тіркегенде пайда болады. Кейде ауыру ұстамасы кезінде тіркелген ЭКГ өзгеріссіз қалыпты күйде болады.