Удмурт кылъя ужрадлы самоанализ
Классной часлэн темаез йырвизез сынан шудон «Визьпогъёс» вал. Та ужрадлэн цельёсыз удмурт кыллы, культуралы ӟеч мылкыд, патриотической мылкыд пыӵатон но удмурт кылъя, культурая но Удмурт шаеръя тодон-валанъёсты юнматон вал. Шудон ортчытэмын 7Б классэн Глазкарысь 16-тӥ номеро школаын.
Та классной час шудон амалэн отчытэмын, малы ке шуоно асьсэос пиналъёс мылкыдзэс веразы, та амалэн мероприятие ортчытэмзы потэ шуыса. Ӵошатскон выллем ужрадъёс, дышетскисьёслэн верамзыя, тунсыкогес потэ, тужгес но тунсыко соослы потӥз удмурт тематика.
Нырысь ик дышетскисьёслы тодыны кулэ вал, кыӵе темая та шудон ортчоз. Та ужпумез соос ӝог быдэстӥзы, «Визьпог» кылэз ӝог берыктӥзы. Жетонъёсъя командаослы люкиськон соослы туж тунсыко потӥз, малы ке шуоно дышетскисьёс мифической но фольклорной геройёсъя люкиськизы. Правилоосты пиналъёс сак кылзӥзы, юанъёссы ӧз кылдэ.
Классной часлэн люкетъёсыз ог-огенызы герӟаськемын вал, групповой ужан каб кутэмын. Нырысь ик быдэсак команда юанлы валэктон сётон понна кенешиз, капитанъёссы командаосазы ӟёч ужазы. Удмурт кыл но краеведение урокъёсысь материалэз дышетскисьёс ужазы кутӥзы. Соос малпанъёссэс удмурт кылын ик вераны быгатӥзы. Куд-ог юанъёс рос-прос малпаськонэз курылӥзы, соин ик дышетскисьёс куддыръя подсказка курылӥзы – со понна баллъёссы ӝынылы ичигес луылӥзы. Пудо-животъёс люкетысь коӵыш сярысь юанын пиналъёс «писэй» вариант сётӥзы. Та вариантэз шонер лыдъяно луиз – пиналъёс, ньылетӥ арзэ гинэ удмурт кылэз дышетыса, «коӵыш» кыллэсь та диалектной вариантсэ гинэ тодо вылэм: та югдур туала учебникез эскерыны кулэ каре.
Озьы ик индивидуальной ужан каб кутэмын вал, кудӥз юрттӥз нимысьтыз капитанъёслэсь тодон-валанзэс эскерыны. Одӥг минутскын вань районъёсты тодэ вайыны шуггес вал ке но, та заданиез соос умой быдэстӥзы.
Рефлексия люкетын дышетскисьёс асьсэос йылпумъянъёс лэсьтӥзы, веразы, мар соослы вылез вал, мае соос кемалась тодӥзы ни. Огъя ужрад соослы яраз. Психологической атмосфера ласянь классной час капчи пӧрмиз: пиналъёс ог-огенызы группаосын умой ужазы, ченгешонъёс соос вискын но, дышетӥсен вискын но ӧз кылдылэ. Нимысьтыз дисциплина сярысь вераны луоз. Классной час куспын соос дырын-дырын туж ӵашетыны кутскылӥзы, соосты буйгатон понна кӧня ке дыр быдтоно луылӥз, соин ик классын дисциплинаез возён ласянь ужано луоз на.
Огъя ужрадлэн ужбервылъёсыз умой пӧрмизы. Пуктэм цель но ужпумъёс классной час куспын быдэстэмын. Дышетскисьёс выль тодон-валан асьсэлы басьтӥзы, азьланьын но таӵе ужрадъёс ортчытыны мылкыд каризы.