Хальмгудыг туулҺсна туск дуд.
“Төрскн һазрин дуд” гидг хураңһугас 211- 224 халхас авгдсн дуд
ОГЛАВЛЕНИЕ
ХАЛЬ М ГУДЫГ ТУУЛҺСНА ТУСК ДУД. 1
ДЕКАБРИН ХӨРН НӘӘМНД.. 3
СИВРҮР ТУУЛҺН... 5
СИВРТ БӘӘЛҺН... 6
БАР САРИН 28-д.. 7
ДАРЬЯН ҺОЛ... 8
УЛАН ЗАЛАТА ХАЛЬМГУД.. 9
ХАЛТА ДЕКАБРЬ.. 11
СИВРТ ҺАРСН ДУД.. 13
95. ДЕКАБРЬ САРИН ХӨРН НӘӘМН... 14
96. ШАР ШАР ПОЕЗД МАШИН... 15
97. ДЕКАБРЬ САРИН КИИТН... 16
98. УЛАН ШИРТӘ ВАГОН... 17
99. КИИТН СИВРТ KYPCH ХАЛЬМГУД.. 18
100. СИВРИН САЛЬКНД.. 19
ДЕКАБРИН ХӨРН НӘӘМНД
Үгнь болн айснь улсин
Декабрин хөрн нәәмнд
Дегц хальмгудыг нүүлһлә,
Дегц нүүлһәд һарвчн
Догшн киитнлә харһулла.
Бәәрндән бәәсн таңһчим
Бүтүһәр нүүлһәд бәәвлә.
Буру уга хальмгудыг
Буру шиидврт зовала.
Көк ширтә вагонь
Күгдләд-күгдләд чирнә.
Элвг, у теегм мини
Өнчрәд, ардм үлдлә.
Килнц уга хальмгудыг
Киитн Сиврт күрглә.
Киитн Сиврт күргвчн
Көгшд, бичкднь һарутна.
Манурсн өргн теегм,
Мал-герм хайгдла.
Мал-герм хайгдв чигн
Менд, эрүл йовцхай.
Эн һазр хәләхнь
Эңдән урһа модн.
Эврә һазран санхнь.
Элкм мини урсна.
Һалун гидг шовунь,
Һазран эргҗ, ниснә.
Һазр-усан санхнь
Һашута нульмсн асхрна.
Эцк-ахнрнь дәәнд
Эңкр Төрскән харсна.
Экнр-дүүнрнь Сиврт
Энрҗ, зовлң үзнә.
Ө-шуһу моднднь
Өрчд күрм цастала.
Харалта эн цаснднь
Хальмгуд мод чавчнала.
Кермн гидг аңнь
Кецү сәәхн аңви.
Киитн Сиврин зовлңгиг
Кезә-кезә мартхви.
СИВРҮР ТУУЛҺН
Үгнь болн айснь улсин
Декабрин хөрн нәәмнд
Дегц хальмгуд туугдвла.
Дегц туугдсн хальмгуд
Догшн киитнлә харһвла.
Улан ширтә вагонднь
Улан залата хальмгуд.
Улан залата хальмгуд
Ууляд-унҗад йовнала.
Көк ширтә вагонднь
Көгшдүд, бичкдүд, гергчүд.
Көгшдүд, бичкдүд, гергчүд
Көлдәд, өлсәд йовнала.
Мал зөөдг вагонднь
Малан өскәдг хальмгуд
Малан өскәдг хальмгуд,
Му-ла заяһан эдлнә.
Ик хар паровознь
Инцхәҗ, Сивр темцнә,
Инцхәҗ, Сивр темцхнь
Иткл, кишг хоцрна.
Киитн улан вагонднь
Кишгнь чилсн хальмгуд,
Кишгнь чилсн хальмгуд
Көлдәд, өлсәд үкнәлә.
СИВРТ БӘӘЛҺН
Үгнь болн айснь улсин
Сиврин цаста аһуднь
Сәәхн моддуд урһнала.
Эңкр һазран санхнь
Элкм мини урснала.
Бүслүрт күрсн цаснднь
Булхҗ, моддуд көрәднә.
Килнц уга хальмгуд
Көрәд, өлсәд йовнала.
Дүүнр, ахнр, эцкнрнь
Дәәнд Төрскән харснала.
Ээҗнр, аавнр, үрдүднь
Энрҗ, Сиврт хорнала.
Тухтет гидг селәнднь
Түрҗ, хальмгуд бәәнәлә.
Таалур бичкдән оршахнь
Толһан үснь боснала.
Кецү күчр бәәдлднь
Көгшдүд, бичкдүд хорнала.
Көпшдүд, бичкдүд хорвчн
Кендән зовлңган келх-ви?
Бичә уулий гихинә,
Төрүц болҗ өгхшлә.
Бичә зовий гихинә,
Түрү бәәдл тәвхшлә.
БАР САРИН 28-д
Үгнь болн айснь улсин
Бар сарин хөрн нәәмнд
Баглад,хальмгудыг нүүлһлә,
Баглад,хальмгудыг нүүлһвчн
Балһсд, селәдәр тарала.
Көк ширтә паровознь
Көдәһинь эргҗ курҗңнә,
Көдәһинь эргҗ курҗңнвчн
Көгшд, күүкднь сурднә.
Сарлң, һалзн үкрмүднь
Сала болһнар мөөрнә,
Сала болһнар мөөрвчн
Советин йосн хайшго.
Һалзн, һалзн нохаснь
Һазаһан уульлдад үлднә,
Һазаһан уульлдад үлдвчн
Һазрин холд үлднә.
Нәәмн төгәтә паровознь
Нәәхлн бәәҗ чирнә.
Нәәхлн бәәҗ чирвчн
Нәр-нааднас хаһцулна.
Бүтү ората машинднь
Бүл-бүләр суулһв.
Бул-бүләр суулһвчн
Байрта һазраснь, хольҗулв.
Җирн төгәтә паровознь
Җирлзәд-җирлзәд һарна.
Җирлзәд-җирлзәд һарвчн
Җирһлтә һазраснь хольҗулна.
Улан ширтә вагонь
Уралан, өмәрән чирнә,
Уралан, өмәрән чирвчн
Уульлдад, шууглдад йовна.
ДАРЬЯН ҺОЛ
Үгнь болн айснь улсин
Улан уста Дарьян Һол
Уух дутман әмтәхн,
Уурган көкүлсн ээҗән санхла,
Улм хөөнән уйдулна.
Һашун уста Дарьян һолас
Һаран уһаһад суулав.
Һарсн Төрскән санхла,
Һашута нульмсн асхрна.
Көк ширтә вагоһарнь
Келкәд чирәд һарва.
Келкәд чирәд һархларн,
Киитн Сивр орулва.
Шар ширтә вагоһарнь
Шаргулад, чирәд һарва.
Шарклҗ, өсксн гер-мал
Шаңһа һазрт үлдвә.
Улан һалзн малмуд
Уульнцд мөөрәд үлдвә.
«Улан залата» хальмгуд
Утдан сәәтә болтха.
Амулң бәәсн хальмгудыг
Аврлт угаһар засглла.
Хаҗһр уга хальмгудыг
Хамгин догшнар засглла.