13-тақырып Кәсіби бәсекелестік. Бәсекеге қабілетті азаматтар – Қазақстанның болашағы. Қазақстан-2030. Етіс категориясы.
Практикалық (семинарлық) сабақтың жоспары
1. Етістерді қайталау.
2. Лексикалық тақырыптар бойынша сұрақ-жауап, әңгімелесу.
3. Жаңа сөздермен жұмыс жүргізу.
КӘСІБИ БӘСЕКЕЛЕСТІК
ХХІ ғасырда тәуелсіз Қазақстанның болашағы білім мен ғылымда. Елбасы өзінің Жолдауында білім беру мәселесіне айрықша мән берген. Мемлекетіміздің инновациялық стратегиясын жүзеге асыруды – болашақтың бағдарламасы деп атаған. Қазақстанның халықаралық бәсекеге қабілеттілігін арттырудың мақсатты міндеттері бұл әлемдік сапа стандарттарына сай бәсекеге қабілетті білімді қамтамасыз ету талаптары болып табылады.
Еліміз егемендік алып, қоғамдық өмірдің барлық салаларында, соның ішінде, білім беру саласында да, жаңа технологияларды енгізу, компьютерлендіру бәсекеге қабілетті тұлғаны қалыптастыруға жол ашуда. Жоғары білімді дамытудың негізгі мақсаты мамандар даярлау сапасын арттыру, инновациялық білімді дамыту, жоғары оқу орындары зерттеулерінің әлеуметтік сала мен экономиканың қажеттіліктерімен тығыз байланысы, білім беру және ақпараттық технологияларды жетілдіру болып табылады.
Ұлы Абайдың адамның үш қасиеті “нұрлы ақыл, ыстық қайрат, жылы жүрек” деген пайымы осы замандағы басымдықтарды – ғылым және білімді /ақыл-парасаттылық аспект/, инновациялық жүйені /қызметтік аспект/, ұлттың рухани әлеуеті мен мәдениетін /құндылықты аспект/ дамытудың қажетті шарттары болып табылады.
Ұлттың бәсекеге қабілеттілігі – бұл әрбір қазақстандықтың, барша қоғамның және мемлекеттің бәсекеге қабілеттілігі. Әрқайсымыз да бәсекелестікті үйренуіміз және бәсеке жағдайында жеңімпаз бола білуіміз керек.
Бәсекеге қабілетті интеллектуалдық күші жетік маман кадрлар болмай, әлемдік бәсекеге төтеп бере алатындай экономика дамымайды
Тапсырмалар:
1. Мәтінді мәнерлеп оқыңыз.
2. Мына сөз тіркестерін есте сақтаңыз: халықаралық бәсекеге, ұлттық бәсекелестік, еліміз егемендік алып, нұрлы ақыл, ыстық қайрат, жылы жүрек
3. Мәтіннің мазмұнын әңгімелеп беріңіз.
4. Осы тақырыпта сұқбаттасыңыз.
5. Ұлы Абайдың «Адамның үш қасиеті» туралы сөздерін әңгімелеп беріңіз.
6. Берілген сөз тіркестерін аударыңыз: қоғамдық мәртебе, тұлғаны қалыптастыру, жан- жақтылығын және кәсіби шеберлігін талап ету.
7. Сіз кәсіби бәсекелестікке дайынсыз ба? Өз пікіріңізді айтыңыз.
8. Төмендегі етістіктерден бұйрық рай жасап, жіктеңіз: үйрену, білу, анықтау, талап ету, мүмкіндік беру.
9. Сөз тіркестерін бұйрық райға айналдырып, сөйлемдер құраңыз: қазақша үйрену, жақсы оқу, білім алу, өмірді сақтау.
10. Білім, еңбек, оқу туралы қандай мақал-мәтелдер білесіз?