Молитва ко преподобному Иоанну Лествичнику
О преподобне отче Иоанне, дивный угодниче Божий и великий светильниче церкве Христовой, святым житием своим просиявый и лествицу духовнаго восхождения нам оставивый. Буди нам ко всякому делу благу помощник и по лествице духовнаго восхождения буди нам вождь ко спасению. Се ныне страстьми греховными обуреваемы есмы: дух лености и праздности, дух ненависти и злобы, дух нерадения и празднословия одержит нас. Ты же в земном житии твоем победил еси вся плотския страсти и избранным селением Духа Святаго соделался еси, ныне же, на небеси вселивыйся велие дерзновение пред Господом Богом имаши. Того ради молимся тебе: по лествице духовнаго восхождения доведи нас к вратам небесным и истинному во гресех покаянию научи нас. Умоли Господа Бога, да простит нам вся согрешения наша вольная и невольная, во временных же нуждах дарует нам благовременную помощь, да наречемся сынами Вышняго и прославим пресвятое имя Его, Отца, и Сына, и Святаго Духа, ныне, и присно, и во веки веков. Аминь.
Тропарь, глас 1
Пустынный житель и в телеси Ангел и чудотворец явился еси, богоносе отче наш Иоанне, постом, бдением, молитвою Небесная дарования приим, исцеляеши недужныя и души верою притекающих ти. Слава Давшему ти крепость, слава Венчавшему тя, слава Действующему тобою всем исцеления.
Кондак, глас 4
На высоте Господь воздержания истинна тя положи, якоже звезду нелестную, световодящую концы, наставниче Иоанне, отче наш.
Величание
Ублажаем тя, преподобне отче наш Иоанне, и чтим святую память твою, наставниче монахов и собеседниче ангелов.