Стих: Помяну́ и́мя Твое́/ во вся́ком ро́де и ро́де.
Стихира: Ра́дуется у́бо и весели́тся/ неизрече́нною ра́достию все мно́жество благочести́вых:/ припа́дающе же покланя́ются,/ вси благогове́ют Бо́жии Ма́тери с боя́знию,/ благодаря́ще Сию́ по Бо́зе я́ко Бо́га,/ толи́ких превели́ких благ Хода́таицу,/ в ня́же жела́ют А́нгели прини́кнути,/ дарова́ Богоро́дицею ве́рным Христо́с Бог наш,// име́яй премно́жество щедро́т и вели́кую пребога́тую ми́лость.
Глас 8:
Стих: Слы́ши, Дщи и виждь,/ и приклони́ у́хо Твое́.
Стихира: Свята́я Твоя́ и сообра́зная ико́на, Богоро́дице Де́во,/ благода́тию Твое́ю пребога́тый су́щий исто́чник,/ кипя́щий всей подсо́лнечней/ и светя́щий всему́ ми́ру светолу́чными Свята́го Ду́ха сия́ньми и исце́лений светлостьми́./ Ты бо Бо́га Сло́ва пло́тию несказа́нно родила́ еси́,/ от Арха́нгела Гаврии́ла сицева́я слы́шавши:/ ра́дуйся Обра́дованная, Госпо́дь с Тобо́ю,/ и Дух Святы́й осени́т Тя к зача́тию./ Та́кожде рекла́ еси́ к первопи́санной Твое́й ико́не, на ту зря́щи:/ с то́ю Моя́ благода́ть,/ и сло́во Твое́ со вла́стию ико́не бы́сть./ И о́браз, и глас, и си́ла, и де́ло, и всяк ум/ превосходя́щая Боже́ственная благода́ть, спребыва́ющи ве́чно,/ зна́мения и чудеса́ непреста́нно содева́ет/ и душеполе́зное исцеле́ние всем ве́рно приходя́щим подае́т// Твои́ми Богома́терними непреста́нными к Бо́гу моли́твами.
Стихи́ра ева́нгельская пе́рвая, глас 1:
Сла́ва Отцу́ и Сы́ну и Свято́му Ду́ху.
На го́ру ученико́м иду́щим за земно́е вознесе́ние,/ предста́ Госпо́дь, и поклони́вшеся Ему́,/ и да́нныя вла́сти везде́ научи́вшеся,/ в поднебе́сную посыла́хуся/ пропове́дати е́же из ме́ртвых воскресе́ние,/ и е́же на небеса́ возше́ствие:/ и́мже и во ве́ки спребыва́ти нело́жный обеща́ся Христо́с Бог,// и Спас душ на́ших.
Глас 2: