Кэпсэтии ханнык тиэмэҕэ барарын билсиһии.
«Дьоһуннааҕы кэпсэтии» : X-XI кылаас үөрэнээччилэригэр аналлаах кылаас чааһа.
Дьарык тиэмэтэ: «Өксөкүлээх үөрэҕэ. Билии-көрүү төрдө» «Саха интеллигенциятыгар» сурукка».
Ыытыллар күнэ: Балаҕан ыйын 4 күнэ 2023 сыл.
Сыала-соруга:
· А.Е. Кулаковскай-Өксөкүлээх Өлөксөй үөрэх, билии туһунан толкуйун «Саха интеллигенциятыгар» суругар олоҕуран билсиһии.
· «Үөрэх, билии — норуот тыын боппуруоһа» диэн санаа тула кэпсэтиһии.
· Үөрэх сайдыыны кытта биир ситимнээҕин өйдөтүү.
Үөрэтэр сыаннаһа. Ытык өйдөбүл: А.Е. Кулаковскай-Өксөкүлээх Өлөксөй «Саха интеллигенциятыгар» суруга үйэлэри уҥуордуур дириҥ ис хоһооннооҕун өйдөтүү.
Ыытыллар бириэмэтэ: 30 мүнүүтэ.
Дьарык хаамыыта: кэпсэтии, мультимедийнэй матырыйаалларга олоҕуран бииргэ үлэлээһин, айар үлэ, тургутугу толоруу.
Дьарык тутулун сценарийа
I чааһа. БИЛСИҺИИ
Кэпсэтии ханнык тиэмэҕэ барарын билсиһии.
(6 мүн.)
УЧУУТАЛ: Үтүө күнүнэн, оҕолор! Саҥа үөрэх дьыла саҕаламмытынан истиҥник эҕэрдэлиибин!
Орто сүһүөҕү бүтэрэн, эһиэхэ билигин олус эппиэтинэстээх, суолталаах кэм кэлэн турар. Ылбыт билиигитин чиҥэтэн, тургутууну, биир кэлим эксээмэни (БКЭ-ЕГЭ) туттарыаххыт. Сөбүлүүр идэҕитин талан, олоххут оҥкулун, хайысхатын быһаарар кэмҥит.
Быйылгы үөрэх дьылыгар «Дьоһуннааҕы кэпсэтии» кылаас чааһа былырыыҥҥы курдук эмиэ хас бэнидиэнньик аайы ыытыллар буолуоҕа. 2023-2027 сс. Саха сиригэр Алексей Елисеевич Кулаковскай-Өксөкүлээх Өлөксөй сылларынан биллэриллибитэ. Бу кини төрөөбүтэ 150 сааһын көрсө ыытыллар биир улахан тэрээһин буолар.
Быйылгы үөрэх дьылыгар «Дьоһуннааҕы кэпсэтиигэ» Өксөкүлээх Өлөксөй оҕо сааһын эйгэтиттэн саҕалаан, айар, чинчийэр үлэлэрин, өйүн-санаатын дьоһуннаан ырытыһар, кэпсэтэр буолуохпут. Ол түмүгэр эһиги олоххо көрүүгүт оннун буларыгар, куккут-сүргүт чиҥииригэр олук охсулларын өйдүөххүт.
Бүгүн биһиги «Өксөкүлээх үөрэҕэ. Билии-көрүү төрдө» диэн тиэмэҕэ кэпсэтиһиэхпит. Кыра кылаастарга саха литературатын төрүттээччи А.Е. Кулаковскай-Өксөкүлээх Өлөксөй ханнык айымньыларын аахпыккытый?
(Оҕолор эппиэттииллэр)
УЧУУТАЛ: Маладьыастар! А.Е. Кулаковскай хас биирдии айымньыта дириҥ ис хоһоонноох, норуотун, саха дьонун сайдыылаах сарсыҥҥытын туһугар туһуламмыттар. Кини үлэлэрэ, суруйан, этэн хаалларбыта ураты суолталаахтар. Ол санааҕа салайтаран, «Өксөкүлээх үөрэҕэ» диэн өйдөбүл киирэн, кини айымньыларыгар олоҕуран, быйылгы үөрэх дьылыгар кэпсэтии барыаҕа. Биһиги 10 (11) кылаастар чопчу «Саха интеллигенциятыгар» суругунан үлэлиэхпит. Бу үлэ туһунан истибиккит?
(Оҕолор эппиэттииллэр)
УЧУУТАЛ: Олус үчүгэй. Бу үлэ тылбааһа, 10 кылаас кинигэтигэр кылгатыллан киирэ сылдьар. Дьиҥ бэйэтин (оригиналы) бибилэтиэкэттэн уларсан ааҕыаххытын сөп. Билигин Өксөкүлээх Өлөксөй оҕо сааһа ханна ааспытын, кини удьуорун туһунан видеоны көрүөххэйиҥ. Болҕойон көрөбүт, онтон сорудах баар буолуо.
Видео.
Педагог, пед. наука кандидата Е.П. Чехордуна.
(3 мүн. 17 сөк.)