II чааһа. СҮРҮН ЧААҺА
УЧУУТАЛ: Оҕолор, эһиги айылҕаҕа сылдьаргытын төһө сөбүлүүгүтүй?
(Оҕолор эппиэттииллэр.)
УЧУУТАЛ: Алексей Елисеевич Кулаковскай айылҕаны кытта алтыһан, тутан-хабан, көрөн-истэн улааппыт киһи буолар. Бу строкалары өйдөөн истиҥ эрэ.
Уолан көҕүрүүн уулаах,
Охтон көҕүрүүр мастаах
Ойор маҕан күннээх
Орто курбуу дьаҕыл дойду.
Өксөкүлээх Өлөксөй
УЧУУТАЛ: Бүгүн биһиги кини айбыт «Сайын кэлиитэ» айымньытын кытта билсиэхпит. «Өксөкүлээх үөрэҕэ» диэн эһиэхэ туһалаах мотивационнай карточкалары түҥэтиэм. Карточка кэннигэр бу тыллары хайдах өйдүүрбүтүн, тугу өйдөөбүппүтүн бэлиэтэниэхпит.
(10 мүн.)
(Оҕолор суруйаллар)
III чааһа. ТҮМҮК ЧААҺА
УЧУУТАЛ: А.Е. Кулаковскай-Өксөкүлээх Өлөксөй улаатарыгар эһэтэ Куонааскы Ньукулай улахан оруолу оонньообута. «Таатта эбэ хотун арҕаа эҥэригэр «Араҥас» диэн сиргэ Куонааскы Ньукулай уолугар Тэрээки Өлөксөөндүргэ дьукаахтаһан олорбута сабаҕаланар. Оҕонньор сиэн уолун ааҕарга, суруйарга, ону таһынан судургу суокка эмиэ үөрэппитин туһунан кэпсииллэр. Сытыы-хотуу, түргэнник өйдүүр тэһиттэҕэс мэйиилээх, билиэн-көрүөн баҕалаах сиэнин эһэтэ дьиэ иһинэн-таһынан үлэҕэ-хамнаска балачча такайдаҕа, дьарыктаатаҕа. Аны устар ууну сомоҕолуур уус-уран тыллаах эбэтэ Ирина Алексеевна дьиэ иһинээҕи дьону кытары таабырын таайсан, сиэннэриниин остуоруйалаһан, хараҥа киэһэлэргэ утуйуохха диэри эмиэ ыаһахтаһаллара өйдөнөр. Эр дьон былыргы сэһэннэри-номохтору кэпсэтэн, уолчаан болҕомтотун күүскэ тартахтара, билиэх-көрүөх баҕалаах оҕо айдарыга эрдэ аһылыннаҕа», – диэн Екатерина Петровна Чехордуна (видеоҕа биһиэхэ кэпсээбит) «Өксөкүлээх оҕо сааһын эйгэтэ» кинигэтигэр суруйбута.
УЧУУТАЛ: Оҕолоор, билигин мин эһиэхэ кырааскалыырга ойууну түҥэтиэм. Видеоҕа истибиппит уонна көрбүппүт курдук, 2022 сыллаахха Таатта улууһугар Тыараһа нэһилиэгэр алтынньы 6 күнүгэр А.Е. Кулаковскай-Өксөкүлээх Өлөксөй төрөөбүтэ 145 сылыгар анаан, оҕо сааһа ааспыт сиригэр, сквер арыллыбыта. Бу кырааскалыыр ойууга Өксөкүлээх Өлөксөйгө уонна кини эһэтигэр Куонааскы Ньукулайга анаммыт пааматынньык. Ким хайдах сөбүлүүрүнэн кырааскалыыбыт, бүтэрбэтэх оҕо дьиэҕэ илдьэн салгыы ситэриэххитин сөп.
(Оҕолор кырааскалыыллар.)
(9 мүн.)
Учуутал уруогу түмүктүүр, быраһаайдаһар.